Meira um ráðningarsaminginn í Guðsríkinu

Fyrirgefðu þér allt, smátt og stórt.

Guð hefur fyrirgefið þér svo þetta er öruggt.

Leiðréttu það sem þú getur

Guð gefur þér kjarkinn og kærleikann til þess.

Úr bók Kvennakirkjunnar: Vertu leiðtogi í þínu eigin lífi.  Með blíðum kveðjum,  Auður Eir

 

By |28 september 2016 20:15|Dagleg trú|

Njótum samveru og styrkjum þau sem við erum með

Gerum okkur grein fyrir hverjum við tilheyrum. Tökum ákvörðun um hverjum við viljum tilheyra. Njótum þess sem samvera okkar við aðra gefur og njótum að gefa af sjálfum okkur í samtali við aðra. Styrkjum aðra með framkomu okkar, leitum til annarra og tökum á móti styrk þeirra.

Með bestu kveðjum,  Sigrún Gunnarsdóttir

 

By |24 september 2016 20:14|Dagleg trú|

Hápunkturinn í Samsonarsögunni !

Eftir mörg ár í dýflissunni er náð í Samson. Filistar héldu mikla sigurhátíð og létu færa sér hann til að hæða hann,  blindan en með hármakka. Og þá ákallar hann Guð,  segir  ” minnstu mín í þetta eina skipti”.    Hann fálmar í burðarsúlurnar, neytir allra krafta   –   og þær gefa eftir !!!    Þakið, sem er þéttsetið fólki fellur og á alla veislugesti, mörg þúsund manns, sem þar lifa sinn síðasta dag.

Bestu kveðjur,  Dalla Þórðardóttir

By |21 september 2016 20:14|Dagleg trú|

Það sem við erum alltaf að segja

Já, nú erum við að skrifa bókina sem við einu sinni ákváðum að skrifa:  Kaffihús vinkvenna Guðs.  Við erum að skrifa um fyrirgefninguna sem er  aðalboðskapur bókarinnar.

Þess vegna er það þegar ég kem á ýmsa staði innan um fólk að mér dettur í hug hvort þetta fólk sé eitthvað að hugsa um það sem við erum að tala um og skrifa.  Ætli þau séu stundum að hugsa um syndina sem er fyrirgefin?  Ég bara veit það ekki.

Ætli við séum kannski bara að tala út í bláinn og ættum frekar að tala öðru vísi, segja annað og segja það á annan hátt?

Það getur bara verið.  Við gerum það líka.  Við tölum um gleðina yfir að vera til og möguleikana til að gera dagana frábæra og gefum gullin ráð úr orðum Biblíunnar:  Hættu nú að dæma annað fólk og sjálfa þig.  En gerðu þér grein fyrir því sem er um að ske. Vertu ekki að fylla hjarta þitt af furðulegum hugmyndum en hafðu nóg rúm þar fyrir það sem er gott og gleðilegt.  Sjáðu hvað þú átt margt í dögunum núna og í minningunum.  Njóttu þess og notaðu.

Þetta segjum við og svo margt fleira í öllum guðþjónustunum og á námskeiðunum og í bókunum okkar.  Þetta er guðfræðin okkar og miklu dýpri en heillaráð til sjálfshjálpar sem eru samt frábær og við notum sjálfar í guðfræði okkar.  Hún er alltaf, hvað sem hún fjallar um, fagnaðarerindið um fyrirgefninguna.  Fyrirgefning Guðs er stórkostlegasta gjöf daganna og í henni megum við fyrirgefa sjálfum okkur.

Blíðar kveðjur,  Auðir

By |25 apríl 2016 21:33|Dagleg trú|

Biðjum hver fyrir annarri

Góðu vinkonur, það er ómetanlegt að eiga hver aðra að.  Að geta komið og hitt hver aðra og fundið öryggið og friðinn af því að vera með öðrum konum sem eiga sömu trúna og við, trúna á Jesúm frelsara okkar sem er Guð vinkona okkar. Biðjum hver fyrir annarri.  Við eigum góða og gleðilega daga og við eigum líka þunga og erfiða daga.  Við segjum það aftur og aftur.  Við skiptumst á,  sumar okkar eiga góða daga núna og aðrar erfiða, við eigum allar góða daga og erfiða eins og við vitum.

Biðjum hver fyrir annarri og vitum og gleðjumst yfir því að það er beðið fyrir okkur á hverjum einasta degi.

Með blíðum kveðjum,

Auður Eir

By |22 apríl 2016 21:30|Dagleg trú|

Við höfum umboð frá Guði

Náð Guðs og orð Guðs kemur til okkar og við leggjum okkur fram við að sjá og heyra.

Sjá vel og vandlega hver og hvar við erum. Gefum sjálfum okkur umboð til að vera við sjálf, þar sem við erum, bara rétt si svona eins og við erum. Stöndum með sjálfum okkur í því sem við erum, hér og nú.

Með bestu kveðjum,  Sigrún Gunnarsdóttir

By |20 apríl 2016 22:01|Dagleg trú|

Úr Ráðningarsamingnum í Guðsríkinu

Þú þarft hugrekki til að lifa kristna trú þína.

Það er að lifa í frelsi Guðs en ekki reglum þínum og annarra.

Þú ert yndisleg manneskja

Guð sagði það.  Treysti því og njóttu þess.

Úr bók Kvennakirkjunnar: Vertu leiðtogi í þínu eigin lífi.

Með blíðum kveðjum,  Auður Eir

By |19 apríl 2016 22:00|Dagleg trú|

Dalía, ó, Dalía – af hverju sveikstu okkar mann?

Og nú er komið að Dalílu, sem einnig var af þjóð Filista. Þeir fengu hana til að komast að leyndarmáli Samsonar, hvernig stæði á kröftum hans. Hann sagði henni þá að ef hár hans yrði klippt yrði hann linur og sem aðrir menn. Og hún svæfði hann og hár hans var klippt. Er hann vaknaði voru kraftar hans horfnir, hvort sem það var eftir hárskurðinn eða, af því að Guð hafði tekið anda sinn frá honum, sem þykir allt eins líklegt. Samson treysti á krafta sína og taldi sig alls ekki venjulegan mann, hann sem átti að verja friðinn, gekk á rétt annarra, borðaði óhreina fæðu, storkaði venjum. Hann gat allt, hefði getað sagt að breyttu breytanda: “ Það er bara fyrir löggur og kellingar” en hann, hann mátti allt.

Þangað til allt í einu. Guð var ekki lengur með í för.

Sagan er ekki búin.

Bestu kveðjur,  Dalla Þórðardóttir

By |17 apríl 2016 21:57|Dagleg trú|

Við getum lesið textann svona.

Svona getum við lesið textann sem ég sendi síðast

Ég hef nú nýjar hugmyndir og er farin að framkvæma þær og þið sjáið það. Ég gef ykkur ný blóm í garðinn, ég vökva hann svo að það sem er þurrt og vatnslaust verður mjúkt og ilmandi og blómin vaxa og trén fá ný lauf.  Það er eins með garð ykkar eigin huga.  Ég gef ykkur orðið mitt.  Og það hefur áhrif.  Þið farið að gera það sem gleður ykkur og verður að svo miklu gagni.

Bestu kveðjur,  Sigrún Gunnarsdóttir

By |15 apríl 2016 21:56|Dagleg trú|

Þegar tómur hugur okkar verður eins og nývökvuð blómabreiða

Þetta eru versin sem ég skrifaði um síðast:

Eyðimörkin og hið þurra landið skulu gleðjast, öræfin skulu fagna og

blómgast sem lilja.  Þau skulu blómgast ríkulega og fagna af unaði og gleði.

Ég geri eyðimörkina að vatnstjörnum og þurrlendið að uppsprettum.

Sjá, nú hef ég nýtt fyrir stafni.  Það tekur þegar að votta fyrir því. 

Sjáið þið það ekki?

Ég geri veg um eyðimörkina og leiði ár um öræfin.

Því eins og regn og snjór fellur af himni ofan og hverfur eigi þangað aftur fyrr en það hefur vökvað jörðina og gert hana frjósama og gróandi og gefið þeim sem sáðu sæði og brauð þeim sem eta, eins er því farið með mitt orð sem útgengur af mínum munni: Það hverfur ekki aftur til mín við svo búið, ekki fyrr en það hefur framkvæmt það sem mér líkar vel og komið því til vegar sem ég fól því að framkvæma.

Ég skrifa ykkur næst hvernig við getum líka lesið þau.

Bestu kveðjur,  Sigrún Gunnarsdóttir

By |13 apríl 2016 21:56|Dagleg trú|