Mánudagskvöldið 7. apríl klukkan háf átta hittumst við í Þingholtsstræti og ljúkum mánudagssamverum vetrarins. Verum allar velkomnar. Við bökum vöfflur og hitum kaffi og tölum um hvað sem við viljum. Ekki væri nú leiðinlegt að sjá þig birtast.
Næsta guðþjónusta Kvennakirkjunnar verður í Dómkirkjunni sunnudaginn 6. apríl kl. 14:00. Sr. Auður Eir Vilhjálmsdóttir prédikar um föstudaginn langa. Anna Sigríður Helgadóirttir syngur einsöng. Aðalheiður Þorsteinsdóttir stjórnar söng með kór Kvennakirkjunnar. Kaffi á kirkjulofti eftir messu. Þær sem sjá sér fært að koma með kaffibrauð fá alúðarþakkir.
Laugardaginn 15. mars sl stóð Hugvísindastofnun Háskóla Íslands fyrir hugvísindaþingi. Meðal fyrirlesara var séra Auður Eir Vilhjálmsdóttir prestur Kvennakirkjunnar sem talaði í málstofu sem Pétur Pétursson prófessor við guðfræðideild stýrði og bar heitið Framtíð íslenska þjóðkirkjufyrirkomulagsins. Fyrirlestur Auðar Eirar bar heitið Nú er tími til siðbótar – eins og alltaf og byggir á efni bókar hennar Bakarí Guðs sem Kvennakirkjan gaf út árið 2012. Þar reifar Auður Eir nýjar hugmyndir um veitingu prestembætta og hvetur til þess að prestar verði hreyfanlegir á milli staða en einangrist ekki hver á sínum stað áratugum saman. Í hugmyndinni felst einnig hvatning til samvinnu og að sumir prestar hafi ekki alltof mikið að gera þegar aðrir hafi of lítið að gera. Eftirfarandi útdráttur var birtur í dagskrá þingsins:
Lútersk kirkja á að vera siðbótarkirkja á öllum tímum. Hún á að fylgja þeirri lútersku guðfræði að við séum öll prestar hvaða starf sem við höfum. Hún þarf að horfast í augu við tilhneigingu sína til kaþólskra messusiða. Og hún þarf að breyta ýmsu í grundvallarskipulaginu, í fyrsta lagi að breyta ráðningu prestanna. Svo að prestar verði ekki keppinautar heldur samheldinn hópur í boðun fagnaðarerindisins. Það þarf að ræða málin og gefa langan tíma til að tala vandlega saman.
Fyrirlestur Auðar Eirar mun birtast í útgefnu efni Hugvísindaþings 2014 og verður líka aðgengilegur á heimsíðu okkar.
Næsta námskeið Kvennakirkjunnar köllum við : HVAR ERU KVENRÉTTINDIN NÚNA ? Á námskeiðinu koma til okkar sérfræðingar sem velta fyrir sér kvennréttindum í samtímanum frá ýmsum sjónarhornum.
Námskeiðið er í stofum Kvennakirkjunnar í Þingholtsstræti 17 . frá 19.30 til 21 og kostar 1000 krónur á kvöldi
Verum allar innilega velkomnar og komum sem getum
Guðþjónusta í Seltjarnarneskirkjusunnudaginn 16. mars klukkan 2 . Athygli er vakin á messutíma. Séra Auður Eir Vilhjálmsdóttir predikar og ræðuefni: Uppgjör við okkur og Guð. Stefanía Steinsdóttir segir frá trú sinni. Laufey Sigurðardóttir leikur á fiðlu og Anna Sigríður Helgadóttir syngur. Aðalheiður Þorsteinsdóttir stjórnar söng með kór Kvennakirkjunnar. Kaffi á eftir. Þær sem sjá sér fært að færa kaffibrauð fá alúðarþakkir
Alla og Anna Sigga, Aðalheiður Þorsteinsdóttir tónlistarstjóri Kvennakirkjunnar og Anna Sigríður Helgadóttir söngkona, voru nú um helgina á Skagaströnd hjá séra Bryndísi Valbjarnardóttur. Þær gáfu kirkjukórnum raddþjálfun og kenndu nýja sálma. Gleðin streymdi milli allra sem töluðu og borðuðu og sungu saman og heilluðust hvert af öðru. Á sunnudaginn var sunnudagaskóli klukkan 11 í Hólaneskirkju og uppskeruhátíð tónlistardaga kl. 2 undir yfirskriftinni Drottinn gerðu hljótt í hjarta mínu. Við hinar Kvennakirkjukonurnar gleðjumst með þeim.
Guðfræðinemar í heimsókn
Nemendur dr. Péturs Péturssonar héldu undir stjórn hans málþing sitt í stofum okkar í Þingholtsstræti seint í janúar Dr. Pétur kom með kók í gleri og Prince Polo til að halda upp á hefðina frá því að afi hans, Ásgeir Ásgeirsson, rak hverfisbúð með matvörur í syðri
stofunni okkar.
Heimsókn Kvenfélags Þykkvabæjar
Konur úr kvenfélagi Þykkvabæjar, Sigurvon, komu í heimsókn í Kvennakirkjuna laugardaginn 1. mars, til að hitta Auði sem var sóknarprestur í Þykkvabæ í 20 ár. Hún hélt með þeim námskeiðið Vertu leiðtogi í þínu eigin lífi. Fyrst skoðuðu þær sýningu Vigdísar Finnbogadóttur
í Hönnunarsafni Íslands og á eftir heimsóttu þær Þuríði á 13 og gengu um Þingholtin og borðuðu í lokin á Austurlandahraðlesinni í Lækjargötu.
Kvennakirkjukonur messa
Auður Styrkársdóttir predikaði í Laugaraneskirkju á konudaginn, 23. febrúar í Laugarneskirkju. Aðalheiður Þorsteinsdóttir
var við orgelið.
Prestar Kvennakirkjunnar, Arndís og Auður, predikuðu og leiddu guðþjónustu að hætti Kvennakikjrunnar á vegum guðfræðinema í Kapellu háskólans í febrúar.
Hallfríður Ólafsdóttir tók þátt í margbreytilegum og fallegum tónleikum KÍTÓN, félags kvenna í tónlist, í Hörpunni, sunnudagskvöldið 2. mars. Hallfríður stjórnaði félögum úr Sinfóníuhljómsveit Íslands sem lék Eld eftir Jórunni Viðar. Eldborg var full af glöðu fólki sem fagnaði Hallfríði ákaflega og klappaði lengi. Hallfríður er fyrsta íslenska konan sem stjórnar sinfóníuhljómsveitinni !!! Hér má sjá umfjöllun um Hallfríði og tónleikana.
Elsku Hallfríður
Kvennakirkjan þakkar þér innilega fyrir tónleikana. Það var ógleymanlegt fyrir okkur sem sáum þig og við og allar hinar sendum þér hamingjusóskir.
Málþing Samráðsvettvangs trúfélaga ,,Trú, skoðunarfrelsi og mannréttindi“ verður fimmtudaginn 27. febrúar í safnaðarheimili Háteigskirkju. Málþingið er haldið í samvinnu við Trúarbragðafræðistofu Hugvísindasviðs Háskóla Íslands. Fundarstjóri er Margrét Steinardóttir, framkvæmdastjóri Mannréttindaskrifstofu Íslands. Öllum heimill ókeypis aðgangur meðan húsrúm leyfir.
Fyrirlesarar verða Ragnar Aðalsteinsson, hæstaréttarlögmaður, Jón Ólafsson, heimspekingur og prófessor við Háskólann á Bifröst og Arnfríður Guðmundsdóttir, guðfræðingur og prófessor við Guðfræði-og trúarbragðafræðideild Háskóla Íslands.
Undanfarin ár hefur verið rætt um árekstra milli trúarhefða og mannréttinda. Ágreiningsefnin varða m.a. kvenréttindi, málefni samkynhneigðra, vígsluathafnir fyrir börn, menntun og tjáningarfrelsi. Markmiðið með málþinginu er að draga fram helstu árekstrana og vega þá og meta út frá lögfræðilegum, heimspekilegum og trúarbragðafræðilegum sjónarhóli.
Spurt verður: Hvað nær trúfrelsi langt? Hvernig er unnt að viðhalda jafnvægi á milli trúariðkunar og mannréttinda? Getur samfélagið samþykkt starfsemi trúfélaga eða trúarbragða sem hafa að geyma kenningar eða stefnur sem talist geta á skjön við almenn mannréttindi? Hvaða úrræði eru fyrir hendi þegar árekstrar eiga sér stað? Hversu langt nær tjáningarfrelsið? Hvað getur flokkast undir hatursorðræðu? Hvernig ber að bregðast við haturshreyfingum?
Aðgangur er ókeypis og allt fólk velkomið – og nú er gott tækifæri fyrir konur Kvennakirkjunnar til að víkka sjóndeildarhringinn. Komum sem getum !
Afmælismessa Kvennakirkjunnar verður í Neskirkju sunnudaginn 16. febrúar kl. 14:00. Athugið breyttan messutíma. Hvers vegna er ég í Kvennakirkjunni? Þórunn Sveinbjarnardóttir. Berta Dröfn Ómarsdóttir syngur einsöng og kór Kvennakirkjunnar syngur undir stjórn Aðalheiðar Þorsteinsdóttur. Séra Arndís G. Bernhardsdóttir Linn predikar. Afmæliskaffi á eftir. Verum innilega velkomnar
